 |
| ما هو التعب النفسي وكيفية التخلص منه - طريقة مجربة |
ما هو التعب النفسي وكيفية التخلص منه - طريقة مجربة
• التعب النفسي،
أو بالأحرى مرحلة الإنهيار اللي كايوصل ليها الإنسان فواحد الوقت من حياتو من بعد مدة كبيرة ديال ما أسميه بالصبر الفارغ أو التظاهر بأنه "بيخير" و مابيه والو. في حين أنه هو هاز فخاطرو كم هائل من الهموم و المشاكل منها البسيطة و المعقدة و منها الكبيرة و الصغيرة . . القلب ديال هاد الشخص كايكون بحال شي سلة عامرة و كاتقال حتى كايقربو يتقطعو ليها يديها منين كاتهز !
و إذا جينا نشوفو السبب الأول ديال هاد الإنهيار اللي كايوقع فآخر المطاف، هو "التحمل" في حين أن الإنسان مامخلوقش باش يتحمل مخلوق و عطاه الله نعمة النطق، يعني بيك شي حاجة عندك مشكل نطق و قول اشنو كاين فرغ ديك الشحنة السلبية اللي هاز فخاطرك. أي شخص دار ليك شي حاجة قوليه أشنو كاين و كون صريح معاه و فنفس الوقت تبقى نتا مصالح مع ذاتك.
و داخل هاد السبب ديال "التحمل" كاين سبب آخر و اللي كانسميه " التظاهر بالقوة" الانسان كايبقا يجاهد فنفسو و يدير راسو راه قوي و قادر يتحمل كولشي "قوة كاذبة" بحال نفاخة منفوخة بالهواء أصغر شيء ممكن يفرقعها هاكا الإنسان اللي كايبقا يعمر فخاطروا و يتحمل و يتظاهر بالقوة أمام نفسو أولا لانه اول واحد كاتكذب عليه هي نفسك و عاد الناس. و أي مشكل جا بسم الله كاتتحملوا اي صدمة جات حتى هي بسم الله تتحملها و تصبر تصبر تصبر و كايبقى صبرك فقط واحد "الصبر فارغ" لأنه ماللي غاتجلس مع نفسك بعيدا على الناس اللي قدامك و اللي دايرين بيك و اللي آذاوك غادي تشدك البكية و تشد واحد القنت و تبداا تنخسس و حتى البكية يقدر ماتبكيهاش عادي .
الحاصول، الإنسان ليس مجبرا على تحمل كل شيء، كاين ما يسمى بالمواجهة، كاتلقى انسان كايعاني من صدمات فحياتو من الناس اللي قراب ليه او صدمات فالخدمة او حكرة كاتيعرض ليها و "يسكت" و بكتم ما بيه لا لا و ألف لا ! ماتكتمش داكشي اللي بيك واجه، عيط على الشخص اللي أذاك او ماتفاهمتيش نتا وياه و صارحو و واجهو بداكشي اللي دار ليك. اي مشكل أو أزمو كاتعيشها الحل ديالها هو المواجهة لانه اذا ماواجهتيهاش غاتبقى دائما تابعاك و غايجي مشكل آخر أو صدمة أهرى و تزيد على اللي قبلها و تعمر السلة ديال قلبك و غادي تتسبب لراسك بتعب نفسي توصل لمرحلة الإنفجار او الانهيار .
تعلم انك تتعايش مع كل مشكل كل ازمة كل صدمة و جلس مع نفسك سول راسك اشنو لسبب ديال هادشي و سول راسك علاش صدمات كايجيوني غير من لقراب واش نتا اللي غالط فتعاملاتك واش نتا اللي ماتص فتيش مزيان او عطيتي قيمة ليهم كتر مما يستحقونه .
و من بعد بهاد التعايش غاتلقا أجوبة، و هكذا هي المواجهة. اذا عرفتي كيفاش أنك تواجه بقوة و ثقة بالنفس كل هاد الكدمات، و ماتخبيش فخاطرك و تكتم فقلبك لانه كاين ناس اللي كاتقول مانواجهش لانه حشومة و ماشي من الصواب و كاين اللي كايخاف على شخص أذاه انه يتقلق ! يتقلق المهم نواجهو و نواجه اي مشكل و يتحداني و دائما نفكر باللي نفسي عندها عليا حق نحميها من الانهيار و الشتات و هاكا تأكد أنه عمرك غاتصاب بهاد التعب النفسي.
الحياة ما هي كلها الا صراعات و مواجهات، ماتعطيش وجهك للمشاكل تصرفقك بصعوباتها و صدمات ديالها، عطيها عقلك